開發部血淚史
細說研發成功之秘！

　　開發遊戲既「難」，相信大家都已經好清楚，不過你又知唔知開發部既人兄響背後既付出呢？到底每一個開發人員需要投入幾多時間，作出幾多修改先算係「合格」，可以推出市場呢？

記：《PC Game Weekly》編輯 白特約雲
濤：《夢幻古龍》遊戲監製 阿濤 (研發老大)

記：雖然開發遊戲有一個特定既流程同公式，但投入既時間往往係超乎所想，到底一個開發人員平均需要投入幾多時間，先可以交到功課，達至合格水平？(由開始至上手，到完成整個工序，平均每個人需要投入幾多時間(小時)，要唔要成日開夜車趕工？)

濤：其實一個遊戲既製作時間，每一種遊戲都唔同，好難一概而論，就以《夢幻古龍Online》為例，我地由籌備到正式版推出，足足用左3年時間。但其實呢三年時間裡面，各方面開始投入工作既時間都唔同，例如一開始，最先開工既會係企劃，我地用左好多個月，將所有古龍小說由頭到尾睇一次之餘，仲要將入面既資料整理，將登場人物﹑物品﹑門派﹑武功﹑場景﹑戲情等等，編集成一本古龍資料大全，之後再o係入面為《夢幻古龍》選材同創作。

　　之後投入工作既就係美術，開始為主角同場景設計概念圖，大家都應該留意度，一個遊戲公佈左開發之後，最先發佈既通常都係一D人物既設定圖，就係咁既原因啦！咁當遊戲既玩法同系統都有左一定既定案，程式就可以正式投入，開始編寫各個遊戲系統。至於開夜車趕工，呢個通常都係發生係後期，即係將近推出，同埋推出左之後，因為呢後時間遇到既問題會係最多，而且時間亦都係最緊迫既。

記：由企劃到落實研發，響咁多個工序之中，一定會遇到D難題，你地又係點去解決？用時間，定交替修改？

濤：難題方面，我分返三方面黎講講。程式方面，會遇到問題都係技術方面，o係開發階段既時候一般都無咩問題發生的，因為程式只要將設計好既系統編寫出黎就可以；但係到左後期既測試或除錯階段，問題係開始出現了，因為通常係呢個階段，程式可能會花好多時間至可以修正好一個Bug，又或者要花好多時間去做好系一個系統既優化。當遊戲出左街之後，就更加緊張了，因為我地要o係最短既時間入面，為玩家帶黎最少影響之前，就將問題解決，真係要同時間鬥快架！

　　美術方面，問題就無程式方面咁複雜，因為美術制成品出黎既結果其實好簡單，就係「靚」同「唔靚」，但係就係因為呢個簡單既「靚」同「唔靚」，我地可能會o係做同一個人物或者場景既時候，不斷咁修改，務求可以將每個細節都做到最好為止，而咁做既結果，就代表要超時工作了。^^

　　企劃方面，最大難題就係當要決定一D遊戲既玩法或者一D系統既取捨啦，因為一日遊戲未出街，你都唔會知道玩家既真正需要係點，所以呢樣野我地只可以多D參考其他遊戲，同埋睇多D玩家對唔同遊戲既討論同意見，睇下邊D野係最受玩家歡迎，邊D最反感咁樣。而一個咁既決定，隨時會帶黎連鎖反應，美術同程式都可能因為設計既唔同，而有唔同既做法，所以企劃既每一個決定都唔可以亂黎架！

碧雲灘原畫

碧雲灘遊戲中場景

記：【平衡與質素】之前提過，《古龍》角色眾多，響同伴設定呢方面，相信好多部份都需要分工打造，但每個開發既風格同喜好都唔同，作為總監既你，又係點維持質素同平衡？

濤：我地做呢個遊戲時既分工好多，其實「同伴系統」只係眾多分工既其中一個部份，其他系統仲有「道具」、「戰鬥」、「技能」等；同伴既設定反而唔會再細分比好多同事負責，主要既都係兩至三位，所以如果獨立黎睇，同伴系統係唔會出現你所講既問題。問題反而係各個系統之間既配合，呢個先係最難既，因為其實所有系統都有佢既關係，例如同伴都可以出技能，就牽涉到技能系統了。而作為監製，其實就係要確保每個系統都可以配合到。

製作後感
記：開發《夢幻古龍》最難既決定係咩？對遊戲製作邊方面既印象最深刻呢？

濤：我好開心，今次可以同《PC Game Weekly》做呢次訪問，可以有機會比玩家知道一個遊戲係點整出黎既～ 了解我地開發遊戲工作人員既一D辛酸，等大家知道要做一個遊戲出黎係一D都唔簡單架，希望大家第日玩遊戲既時候，都可以用心咁去感受我地付出過既努力啦！^^

企劃平時用既參考書