開發流程絕密公開
研發親述箇中難關

 　　開發一款網遊，響好多人心目中，都以為係左抄抄右抄抄既簡單製作，但事實上，開發需要配合好多方面既要求，真正既難唔係「創」，而在「合」，到底一個遊戲既開發流程係點既呢？到底係咪大家諗得咁簡單呢？

記：《PC Game Weekly》編輯 白特約雲
濤：《夢幻古龍》遊戲監製 阿濤 (研發老大)

記：好多人都想知道一個遊戲既開發流程，可唔可以略略講講其中既重點？

濤：一個遊戲一開始係點樣誕生既呢？其實一開始都係由一個概念開始，一個遊戲既概念通常包括左佢既遊戲類型(MMO、回合制RPG、動作類、優閒類等等)、佢既風格(可愛、Q版、真實型、中國式、日式)、同埋佢既主要特式。當開發部所有組員都對呢個概念有左了解，下一步就可以分工合作咁開始工作啦！

　　遊戲既製作過程大體黎講係主要可以分成三大部份，就係「企劃」、「程序」同「美術」。一個遊戲由無到有，就係主要由呢個三大部份入面不同的人員去合力打造出黎。

　　「企劃」開始既時候就會因應個概念，用文字同圖片表達出黎，寫成文檔，之後就可以再詳細D咁去設計各樣細節，例如世界觀、登場既有咩角色、故事劇情、有咩場景、場景同故事既關係等等，呢D都要係文檔度清楚描述。

　　「美術」就可以因應「企劃」比既概念資料、將文字上面描述既人物、怪物、場景等畫出黎，我地叫做「原畫」。有左原畫之後，美術部既其他同事就可以用呢D設定，真正咁製作成遊戲入面用得既圖像，包括佢既既3D模型、人物角色既造型、動畫、攻擊既特效等等。

　　而「程序」呢，就可以因應「企劃」既玩法資料，用電腦語言寫出黎，即係編程，佢地會為遊戲既各個系統寫成遊戲原代碼，原代碼編譯之後，就會變成一個可以運行度既程序。

　　o係跟住落黎既製作過程，其實就係呢三方面既人員做既內容整合一齊，例如美術部做好既場景，會比「企劃」係上面放置適當既人物同怪物、物件，之後再放入已經可以運行既程序入面。一個遊戲既各個部份，就係咁樣一步步打造出黎。當所有基本元素都完成既時候，就可以進入最後既調整、測試、除錯階段。

　　其實以上講既係將整個製作過程好簡單同好概括咁講，其實當中包括左好多複雜既過程、同埋各個部門點樣合作同溝通得好都係好講經驗既，一個遊戲並唔係表面上睇咁將d公仔變成動畫，再加d對白咁就可以完成架^^。

記：【平衡與質素】之前提過，《古龍》角色眾多，響同伴設定呢方面，相信好多部份都需要分工打造，但每個開發既風格同喜好都唔同，作為總監既你，又係點維持質素同平衡？

濤：我地做呢個遊戲時既分工好多，其實「同伴系統」只係眾多分工既其中一個部份，其他系統仲有「道具」、「戰鬥」、「技能」等；同伴既設定反而唔會再細分比好多同事負責，主要既都係一兩位，所以如果獨立黎睇，同伴系統係唔會出現你所講既問題。問題反而係各個系統之間既配合，呢個先係最難既，因為其實所有系統都有佢既關係，例如同伴都可以出技能，就牽涉到技能系統了。而作為監製，其實就係要確保每個系統都可以配合到。

下期預告：
開發部血淚史

　　開發遊戲既「難」，相信大家都已經好清楚，不過你又知唔知開發部既人兄響背後既付出呢？下期，同你逐一揭曉開發部既心酸血淚史！